2012 වර්ෂය ශ්‍රී ලංකාවේ "දේව වචන‍යේ වසරයි"

2012 වර්ෂය "දේව වචනයේ වසර" ලෙසින් අති උතුම් මැල්කම් කාර්ඩිනල් රන්ජිත් හිමිපාණන් විසින් පසුගියදා ප්‍රකාශයට පත් කරන ලදි.  ඒ සඳහා නිකුත් කළ සන්නස් පත්‍රය පහතින් දැක්වේ.


සදාදරණීය සහෝදර සහෝදරියනී,
පිතා පුත්‍රයා හා ශුද්ධාත්මයාණන් වන ත්‍රිත්වයික දේවෝත්තමයාණන් වහන්සේට සදාකාලයට ප්‍රශංසා වේවා!


අති ශුද්ධ වූ දිව්‍ය සත්ප්‍රසාද වහන්සේ සහ දේව වචනය ක්‍රිස්තුස් වහන්සේගේ අනුගාමිකයන් වන අප ලද උත්කෘෂ්ට තිළිණයක් වන අතර, එමගින් උන්වහන්සේගේ ප්‍රේමය ශුද්ධ වූ පූපය තුළ වැඩවසන අපේ දිව්‍යමය ආහාරය ද, උන්වහන්සේගේ වචනය අපට කතා කරන, අප දිවි බලගතු ලෙස වෙනස් කරන්නට අප මෙහෙයවන හඬ මෙන් ද අපි අත්දකිමු. අපගේ විශ්වාසය යළි සවිමත් වන්නේ උන්වහන්සේගේ ශ්‍රී ශරීරයෙන් හා රුධිරයෙන් ‍පෝෂණය වීමෙන් පමණක් නොවන අතර, උන්වහන්සේගේ හඬට ප්‍රත්‍යක්ෂ සවන් දීම ඔස්සේ අප ලබා ගන්නා දේව වචනය සදාකාලිකව අප තුළ පවතී. ඇත්තෙන්ම දේව වචනයට ගරු බුහුමන් දැක්වීම අපගේ කිතුනු විශ්වාසය සුරකින අතර, දිව්‍ය සත්ප්‍රසාද වහන්සේ ලබා ගැනීමෙන් එය සවිමත් වේ. එලෙස දේව වචනය "ජීවමාන හා ඵලදායී" [හේබ්‍රෙව් ‍4 : 2] වන අතර කැපවූ ක්‍රිස්තියානි ජීවිතයක මූලික පදනම ද වන්නේ ය.

දේව වචනය දේශනා කරන්න. කලටත් අකලටත් එහි නිරතව සිටින්න. ඉවසිලිවන්තව උගන්වමින් සත්‍යය පහදා දෙන්න. දිරිගන්වන්න." [2 තිමෝති 4 : 2] ශුද්ධ වූ පාවුළුතුමාගේ මේ අවවාද අනුශාසනාව අපට දෙවියන් වහන්සේගේ වචනය නියතව හා අනුරූපී ලෙස ප්‍රකාශ කිරීමට දිරි දෙයි. ශුද්ධ ලියවිලි දෙවියන් වහන්සේ වෙතින් ප්‍රබෝධයක් ගෙන දෙන අතර, "ඉගැන්වීමට ද දුර්මත දුරු කිරීමට ද හික්මවීමට ද ධර්මිෂ්ඨ ජීවිතයක් ගත කිරීම පිණිස උපදෙස් දීමට ද ප්‍රයෝජනවත් වෙයි." [2 තිමෝති 3 : 16] දේව වචනය විශ්වාසයේ දහම් පුබුදුවක් සඳහා කියවීම, අධ්‍යයනය කිරීම, යාච්ඤා කිරීම, ජීවත්වීම ඔස්සේ ජනවන්දනාව මහෝත්සවාකාරයෙන් සමරමින් අන්‍යයන් හා බෙදා හදා ගැනීම ද තුළ ක්‍රියාවට නැංවිය යුතුය.

"දේව වචනය තුළින් විශ්වාසයේ නවෝදයක් කරා"
දයාබර ගරු පියතුමනි, සහෝදරතුමනි, පැවිදි සොහොයුරියන් සහ ජේසු සමිඳුන් තුළ මා දයාබර සහෝදර සහෝදරියනි,

කොළඹ අගරදගුරුතුමන් වන මැල්කම් කාර්ඩිනල් රන්ජිත් නම් මා, අති උතුම් සොලොස්වන බෙනඩික්ට් ශුද්ධෝත්තම පියතුමන්ගේ සසුන් පිය ධූරාවලියේ සත්වන වසරේ දී ගෞරවයෙන්, ප්‍රශංසාවෙන්, ආනන්දයෙන් හා නිහතමානීත්වයෙන් අපගේ දාරක භක්ති ආදර හදවතින් ක්‍රිස්තුස් වහන්සේගේ අති මහෝත්තම හා අභිරහස්‍යමය ශරීරයේ සාමාජිකයන් ලෙස එක්රැස්වී කොළඹ අගරදගුරු පදවි සංඝය 2011 ආගමන සමයේ පළමු ඉරුදින වූ අද පටන් දෙවියන් වහන්සේගේ වසර වූ 2012 ඔක්තෝබර් 10 දක්වා මහිමාලංකාරයෙන් දේව වචනයේ වසර මහත් ගෞරව බහුමානයෙන් යුතුව පවත්වන බව දේව මහිමය හා සැදැහැවත් ජනතාවගේ සිත් ප්‍රබෝධය සඳහා ප්‍රකාශ කරමු.

දිව්‍යමය වචනය අප සමග රැ‍ඳෙමින් අප ශක්තිමත් කරත්වා! දෙවිඳුන්ගේ මෑණියන් වූ අප ශුද්ධ වූ කන්‍ය මරිය මාතාවන්ගේ මධ්‍යස්ථකම අපට නිරතුරුව ම ලැබේවා!

මේ වගට අත්සන් කළේ,
අති උතුම් මැල්කම් කාර්ඩිනල් රන්ජිත්
කොළඹ අගරදගුරු හිමි

 2011 ඉල්මස 26 වන ඉරුදින කොටහේන ආසන දෙව්මැදුරේ දී.

[සන්නස් පත්‍ර අංක 03]